అమెరికా సైనికుడిపై కోతి దాడి.. ఇరాన్ ఉద్రిక్తతల మధ్య వింత ఘటన

అంతర్జాతీయంగా తీవ్ర ఉద్రిక్తతలు నెలకొన్న వేళ, ఒక కీలకమైన సైనిక ఆపరేషన్‌పై వెళుతున్న అమెరికా నౌకాదళ సైనికుడికి వింత అనుభవం ఎదురైంది. ప‌శ్చిమాసియాకు వెళుతున్న అతడిపై థాయ్‌లాండ్‌లో ఒక కోతి దాడి చేసింది. ఈ ఘటనలో ఆ సైనికుడు గాయపడటంతో అతడిని వెంటనే జపాన్‌లోని ఆసుపత్రికి తరలించారు. ఈ విచిత్ర సంఘటన అమెరికా సైనిక వర్గాల్లో చర్చనీయాంశంగా మారింది.

వివరాల్లోకి వెళితే... హ‌ర్మూజ్ జలసంధిలో ఇరాన్ అమర్చిన మైన్‌లను తొలగించేందుకు అమెరికా నౌకాదళానికి చెందిన 'యూఎస్ఎస్ చీఫ్' అనే మైన్‌స్వీపర్ నౌక బయలుదేరింది. ఈ నౌక థాయ్‌లాండ్‌లోని ఫుకెట్ తీరంలో ఆగింది. ఈ సమయంలో విశ్రాంతి కోసం ఒడ్డుకు వెళ్లిన ఓ సైనికుడిపై స్థానికంగా ఉండే ఒక కోతి దాడి చేసింది. దీంతో గాయపడిన అతడిని హుటాహుటిన జపాన్‌లోని ససెబోలో ఉన్న అమెరికా నౌకాదళ స్థావరానికి తరలించి వైద్యం అందిస్తున్నారు. సైనికుడి ఆరోగ్యం నిలకడగానే ఉందని, ఈ ఘటన వల్ల నౌక మిషన్‌కు ఎలాంటి ఆలస్యం జరగలేదని నేవీ అధికారులు తెలిపారు.

ఈ పరిణామంపై ఒక అమెరికా సైనిక అధికారి స్పందిస్తూ... "కొన్నిసార్లు ఇలాంటి వింత సంఘటనలు జరుగుతాయి. ఇది కచ్చితంగా మా అంచనాలకు అందని పరిణామం" అని వ్యాఖ్యానించారు. యుద్ధ సమయాల్లో ఇలాంటి ఊహించని ఆటంకాలు కూడా ఎదురవుతాయని ఈ ఘటన తెలియజేస్తోందన్నారు. కాగా, థాయ్‌లాండ్‌లో మకాక్ జాతి కోతులు పర్యాటకుల నుంచి ఆహారం, వస్తువులు దొంగిలించడం, దాడులు చేయడం సర్వసాధారణం. ఈ కోతుల ద్వారా ప్రమాదకరమైన 'హెర్పెస్ బి వైరస్' వ్యాప్తి చెందే ప్రమాదం ఉందని అమెరికా వ్యాధి నియంత్రణ కేంద్రం (సీడీసీ) హెచ్చరిస్తోంది.

ప్రస్తుతం హ‌ర్మూజ్ జలసంధిలో అమెరికా, ఇరాన్ మధ్య తీవ్ర ఉద్రిక్తతలు కొనసాగుతున్నాయి. ప్రపంచ చమురు వాణిజ్యంలో ఐదో వంతు ఈ మార్గం గుండానే జరుగుతుంది. గత రెండు నెలలుగా ఈ జలసంధిని మూసివేయడంతో పాటు ఇరు దేశాలు తమ నౌకలను మోహరించాయి. ఈ మార్గంలో మైన్‌లు అమర్చే ఏ పడవనైనా కాల్చివేయాలని అమెరికా అధ్యక్షుడు ట్రంప్ నిన్న ఆదేశాలు జారీ చేయడం గమనార్హం. ఈ ఉద్రిక్త పరిస్థితుల మధ్య జరిగిన కోతి దాడి ఘటన అంతర్జాతీయంగా ఆసక్తిని రేకెత్తిస్తోంది.